• plus de 3 mois

    DR MUHAMADU FAALIL SIH: «PINAL KO JUBBOL NGOL GASATAA MOOREEDE, PINAL DIWTII ÑEEÑE ƊEE».,


    Ɓamtaare woodanaani en, so tawii en ngardinaani pinal men. Woni pinal ko tinal iwdi mum, ganndal nduu sabbundu woofnundu renndooji men gila e jamanuuji limtinɗi, seekndu tuma, sori keneeli mbaylaandi dow daabaa fergooji. Wonaa tan jime ɗee e ngamri ndii, wonaa tan koɗli ɗii e daaɗe coorumbe ɗee, wonaa tan siŋko ngoo, toppu ngoo, fino ngoo maa cuɗaaje ɗee, haaɗaani tan e kadduki kii e moori ɗii, maa dudungal ngal e ñerungal ngal. Ko joofaa e pinal koo diwtii ñeeñe ɗee, woni cañooje heen, woni cehooje heen, woni ɗatooje heen, woni lawooje heen, woni oogooje e baylooje, woni pentooje konnguɗi ceniiɗi e gaaci dimi jartorteeɗi caggal poolguuji e golwole. Pinal diwii ɗoon so wonde ko daɗɗii ɗum ɗoo fof koo. Pinal ko mbaydi ndi renndo sañata nder lappol nguurndam mum ngam wonana ɗum ndaɗɗudi geɗe nguurndam, duttorgal, naŋtorgal, cuɗorgal, diisnorgal, teeynorgal; ko ɗum jubbol ngol gasataa mooreede, ngol kala yontannde ronata, waɗɗoo ɗum faamde cañu nguu ngam jokkude moorol ngol, nde siŋkira ngol kaaƴaaɗe jaamaanu mayre, no adiiɓe ciŋkirnoo ngol e jamanuuji kawrunoo ɗii. Ndeen noon jubbol pinal men ina fadi en; faamde ngooroondi moorol maggol ina waɗɗii e men mbele njokken haaƴde ɗii korli dimi, seŋde e majji kaaƴaade kese ɗe tafir-ɗen ñeeñal ngal hakkillaaji yonta men penti. Yonta men ka ganndineeje e karalle. Waɗde yo kootone karalle jarniraaɗe ganndineeje nguurte e jubbi pinal; ɗii dimi laadooji, piiltotooɗi laddeeji, gila to puɗnoo too e Heli-e-Yooyo haa yettii ɗo men.

    Dr Muhamadu Faalil Sih

    Journal pulaar

    Comments:



    Laisser un commentaire